महेश्वर महर्जन
काठमाडौं, २७ जेठ — नेपालमा विद्युत् प्रसारण पूर्वाधार विस्तारका लागि महत्वपूर्ण मानिएको एमसिए–नेपाल अन्तर्गतको प्रसारण आयोजना औपचारिक रूपमा निर्माण चरणमा प्रवेश गरेको छ। बुधबार नुवाकोटको रातमाटेमा आयोजित विशेष समारोहमार्फत रातमाटे र न्यू दमौली सबस्टेशनसँगै २९७ किलोमिटर लामो प्रसारण लाइन निर्माण कार्यको शुभारम्भ गरिएको हो।
यो आयोजना अमेरिकी सरकारको मिलेनियम च्यालेञ्ज कर्पोरेशन (एमसीसी) मार्फत प्राप्त ५५ करोड अमेरिकी डलर अनुदान तथा नेपाल सरकारको करिब १९ करोड ७० लाख अमेरिकी डलर लगानीमा अघि बढाइएको हो। आयोजनाले नेपालको विद्युत् प्रसारण क्षमता अभिवृद्धि गर्नुका साथै ऊर्जा क्षेत्रको दीर्घकालीन विकासमा महत्वपूर्ण योगदान पुर्याउने अपेक्षा गरिएको छ।
निर्माणाधीन प्रसारण लाइन लप्सीफेदी–रातमाटे–न्यू हेटौँडा, रातमाटे–न्यू दमौली तथा न्यू दमौली–न्यू बुटवल गरी तीन खण्डमा विस्तार हुनेछ। एमसीसी नेपाल कम्प्याक्टअन्तर्गत अन्ततः तीनवटा ४०० केभी क्षमताका अत्याधुनिक सबस्टेशन र ३१५ किलोमिटर प्रसारण लाइन निर्माण गर्ने लक्ष्य रहेको छ।
कार्यक्रममा अर्थ सचिव डा. घनश्याम उपाध्यायले ऊर्जा सुरक्षालाई सुदृढ बनाउन तथा औद्योगिक विकासलाई गति दिन यस्ता पूर्वाधार अपरिहार्य रहेको बताए। नेपालका लागि अमेरिकी कार्यवाहक राजदूत स्कट अर्बमले पनि परियोजनाले नेपालको ऊर्जा भविष्यलाई थप मजबुत बनाउने विश्वास व्यक्त गरे।
एमसीसीका आवासीय राष्ट्रिय निर्देशक डायन फ्रान्सिस्कोका अनुसार आयोजनाले देशभरका घरपरिवार, उद्योग तथा व्यवसायलाई भरपर्दो विद्युत् आपूर्ति सुनिश्चित गर्न सहयोग पुर्याउनेछ। नेपाल विद्युत् प्राधिकरणका कार्यवाहक कार्यकारी निर्देशक दीर्घायु कुमार श्रेष्ठले निर्माण हुने संरचनाहरू राष्ट्रिय प्रसारण सञ्जालको अभिन्न हिस्सा हुने बताए।
निर्माण सम्पन्न भएपछि रातमाटे र न्यू दमौली सबस्टेशन नेपालकै सबैभन्दा ठूला उच्च–भोल्टेज विद्युत् केन्द्रमध्येमा पर्नेछन्।
