दुई तिहाई सरकारको प्रधानमन्त्री बालेन्द्र शाह किन एक्लो ?

काठमाडौं । प्रतिनिधिसभामा दुई तिहाइनजिकको राजनीतिक समर्थन रहेको सरकारका प्रधानमन्त्री बालेन्द्र शाहले मध्यरातमा सामाजिक सञ्जालमार्फत आफू ‘एक्लै लड्नुपर्ने’ अवस्था आएको संकेत गरेपछि सरकारभित्रको शक्ति–सम्बन्ध र समन्वयमाथि प्रश्न उठ्न थालेको छ ।

बहुमतको हिसाबले बलियो देखिए पनि प्रधानमन्त्री शाहको पछिल्लो अभिव्यक्तिले सरकार सञ्चालनमा उनी राजनीतिक रूपमा एक्लिँदै गएको हो कि भन्ने बहस जन्माएको छ । अझ रोचक पक्ष के छ भने, संसदमा सरकार पक्षीय सांसदहरूको पर्याप्त संख्या हुँदाहुँदै पनि प्रधानमन्त्रीले आफूलाई ‘एक्लो’ महसुस गर्नुपर्ने अवस्था किन आयो भन्ने प्रश्न हो ।

सरकारका निर्णय र प्रधानमन्त्रीको धारणाबीच देखिने कतिपय अन्तरले पनि यही प्रश्नलाई बल पुर्‍याएको छ । अर्थमन्त्रीले बजेटमार्फत शिक्षा र स्वास्थ्य क्षेत्रमा करको भार बढाउने व्यवस्था अघि बढाउँदा प्रधानमन्त्री शाह त्यसलाई उल्ट्याउने पक्षमा देखिए । त्यस्तै, गृहमन्त्री सुदन गुरुङले नेपालमा तिब्बतीहरूको धार्मिक सम्मेलनका लागि पहल गरेको विषयमा प्रधानमन्त्री शाह असहमत देखिएर त्यसलाई रोक्ने अवस्था आएको चर्चा भयो ।

यी घटनाले मन्त्रिपरिषद् र प्रधानमन्त्रीबीच पर्याप्त समन्वय छ कि छैन भन्ने प्रश्न उठाएको छ । पार्टीले गर्ने निर्णय, मन्त्रीहरूले अघि बढाउने नीति र प्रधानमन्त्रीको अन्तिम धारणा एउटै दिशामा नदेखिँदा सरकारभित्रै मतभेद रहेको सन्देश बाहिर जान्छ ।

अर्कोतर्फ, आफ्नै पार्टीका केही सांसदहरूले संसदमा सरकारको कामकारबाहीमाथि प्रश्न उठाउन थालेपछि प्रधानमन्त्रीको ‘बाहिर देखिएभन्दा वास्तविकता फरक हुन सक्छ’ भन्ने सन्देश थप अर्थपूर्ण बनेको छ । सरकारको बचाउ गर्नुपर्ने सांसदहरू नै आलोचक देखिनु राजनीतिक नेतृत्वका लागि सामान्य अवस्था होइन ।

महँगी, शान्ति–सुरक्षा, मधेशको तनाव, प्रशासनिक कार्यसम्पादन तथा छिमेकी मुलुकसँगको सम्बन्धका विषयमा पनि सरकारमाथि प्रश्न उठिरहेका छन् । तर दुई तिहाइनजिकको समर्थन हुँदाहुँदै प्रधानमन्त्रीले आफूलाई एक्लो महसुस गर्नुको वास्तविक कारण कहाँ छ ?

प्रधानमन्त्री शाहले विगतमा ‘एक्लै लड्ने’ राजनीतिक शैली अपनाएका थिए । तर अहिले उनी महानगरका मेयर होइनन्, मुलुकका प्रधानमन्त्री हुन् । प्रधानमन्त्रीका लागि सामाजिक सञ्जालको अभिव्यक्तिभन्दा मन्त्रिपरिषद्को एकरूपता, पार्टीभित्रको समन्वय, संसदको समर्थन र सरकारी परिणाम महत्वपूर्ण हुन्छ ।

त्यसैले प्रश्न सरकार कमजोर छ कि प्रधानमन्त्री एक्लो छन् भन्ने मात्र होइन—दुई तिहाइको राजनीतिक शक्ति हुँदाहुँदै प्रधानमन्त्री बालेन्द्र शाह किन एक्लो महसुस गरिरहेका छन् ? यसको जवाफ आगामी दिनमा सरकारका निर्णय, कार्यान्वयन र परिणामले नै दिनेछ ।