महेश्वर महर्जन
काठमाडौं — भूमि व्यवस्थापन तथा अभिलेख विभाग ले घरजग्गा कारोबारसम्बन्धी नयाँ सूचना जारी गर्दै कानुनी व्यक्तिसँग सम्बन्धित कारोबारमा कडाइ गरेको छ। विभागको डिल्लीबजार, काठमाडौंस्थित कार्यालयबाट जारी सूचनामा विशेष गरी उच्च मूल्यका कारोबारलाई लक्षित गरिएको छ।
सूचनाअनुसार महानगरपालिका तथा उपमहानगरपालिका क्षेत्रभित्र ३ करोड रुपैयाँभन्दा बढी थैली अंक भएको घरजग्गा कारोबारमा, यदि त्यो कारोबार कानुनी व्यक्ति (कम्पनी वा संस्था) सँग सम्बन्धित छ भने, अनिवार्य रूपमा इजाजतपत्र प्राप्त कम्पनी/संस्थामार्फत मात्रै कारोबार गर्नुपर्ने व्यवस्था गरिएको छ।
यस प्रावधानले प्राकृतिक व्यक्ति (व्यक्तिगत) बीच हुने कारोबारलाई भने प्रत्यक्ष रूपमा बाध्यकारी बनाएको छैन। अर्थात्, नियम विशेष रूपमा कम्पनी वा संस्थासँग जोडिएका कारोबारमा मात्र लागू हुने स्पष्ट गरिएको छ।
विभागले मालपोत ऐन २०३४ को दफा ६(क) मा भएको व्यवस्थाअनुसार यस्तो इजाजतपत्र लिनुपर्ने प्रावधानलाई कार्यान्वयनमा ल्याउन खोजिएको जनाएको छ।
साथै, इजाजतपत्र प्राप्त कम्पनी तथा संस्थाहरूको सूची विभागको वेबसाइटमा राखिएको जानकारी समेत सूचनामा उल्लेख गरिएको छ। सरोकारवालाहरूलाई सोही व्यवस्था अनुसार कारोबार गर्न विभागले आग्रह गरेको छ।
