चीनमा विश्वकै पहिलो ह्युमनोइड रोबोट एमएमए प्रतियोगिता सुरु, एउटा रोबोटको टाउको नै फुत्किँदा हलचल

चीनको रोबोटिक्स कम्पनी 'इन्जिनएआई'ले शेनझेनको नानशान कल्चर एन्ड स्पोर्ट्स सेन्टरमा विश्वकै पहिलो ह्युमनोइड रोबोट मिश्रित मार्शल आर्ट्स (एमएमए) प्रतियोगिता सफलतापूर्वक आयोजना गरेको छ। 'अल्टिमेट रोबोट नकआउट लिजेन्ड' (यूआरकेएल) नाम दिइएको यस प्रतियोगितामा कम्पनीको पूर्ण आकारको ह्युमनोइड रोबोट 'टी८००'ले हातहतियार बिनाको प्रत्यक्ष लडाइँ गर्न सक्ने क्षमता प्रदर्शन गरेको छ।

विश्वभरका १० देशका २०० भन्दा बढी टोलीले अनलाइन छनोट राउन्डमा भाग लिएका थिए, जसबाट ३२ टोली अन्तिम प्रतियोगिताका लागि छानिएका थिए। हरेक टोलीलाई मानक प्लेटफर्मका रूपमा टी८०० रोबोट दिइएको थियो, जसमा टोलीहरूले आ-आफ्नै सफ्टवेयर र हार्डवेयर सुधार गरी लडाइँका लागि तयार पारेका थिए। प्रतियोगितामा क्यालिफोर्निया बर्कले, स्ट्यानफोर्ड, सिङ्घुआ र हङकङ विश्वविद्यालय लगायतका टोलीहरूको सहभागिता रहेको थियो, जसमा करिब १० लाख (१ करोड युआन बराबर) अमेरिकी डलरको पुरस्कार राशि राखिएको थियो।

प्रतियोगिताको एउटा प्रमुख फाइटमा 'ह्वाइट इगल' नामक रोबोटले प्रतिद्वन्द्वी 'माटाडोर'लाई शक्तिशाली किक हानेको थियो, जसका कारण माटाडोरको टाउको खुस्कियो। तर आश्चर्यजनक रूपमा माटाडोर टाउको झुण्डिएकै अवस्थामा केही समय लडाइँ जारी राख्न सफल भयो, जुन दृश्य सामाजिक सञ्जालमा भाइरल बनेको छ।

प्रतियोगिताका आयोजकहरूका अनुसार यसको उद्देश्य रोबोटको सन्तुलन, स्थायित्व, प्रहार सहनशीलता र वास्तविक-समयमा नियन्त्रण क्षमता जाँच्नु थियो। सुरुवाती चरण जुलाई-अगस्टसम्म चल्नेछ भने दोस्रो चरण सेप्टेम्बर-अक्टोबरमा र फाइनल वर्षको अन्त्यतिर हुनेछ।

यस प्रतियोगिताले ह्युमनोइड रोबोट प्रविधिको तीव्र विकासलाई देखाएको छ, तर विश्लेषकहरूले यसले रोबोटको व्यावहारिक प्रयोगका सीमितता र थप वास्तविक-जीवन परीक्षणको आवश्यकतालाई पनि उजागर गरेको बताएका छन्। यही समयतिर संयुक्त राष्ट्रसंघका महासचिव एन्टोनियो गुटेरेसले कृत्रिम बुद्धिमत्तामाथि कडा नियमनको आवश्यकता औंल्याएका थिए।