काठमाडौं । इरानले अमेरिकी राजधानी वासिङ्टन डीसीमा ‘डर्टी बम’ वा रासायनिक हतियार प्रयोग गरी अमेरिकी राष्ट्रपति डोनाल्ड ट्रम्प प्रशासनका वरिष्ठ अधिकारीहरूलाई निशाना बनाउने सम्भावित योजना तयार गरिरहेको अमेरिकी गुप्तचर निकायको पछिल्लो सूचनाले देखाएको छ। यद्यपि, उक्त योजना कार्यान्वयन गर्ने निर्णय भइसकेको वा तत्काल आक्रमणको जोखिम रहेको पुष्टि नभएको अमेरिकी अधिकारीहरूले बताएका छन्।
सीएनएनले सात जना अमेरिकी अधिकारीलाई उद्धृत गर्दै सार्वजनिक गरेको विशेष रिपोर्टअनुसार, अमेरिकी गुप्तचर निकायले इरानको सम्भावित आक्रमण योजनाबारे सूचना प्राप्त गरेपछि सुरक्षा निकायहरू सतर्क भएका छन्। योजनामा सम्भावित लक्ष्य र स्थानसमेत उल्लेख रहेको दुई अधिकारीले बताएका छन्।
अमेरिकी अधिकारीहरूका अनुसार इरानले हालैका अमेरिकी सैन्य आक्रमण र आर्थिक नाकाबन्दीको दबाबबीच अमेरिकाभित्रै आक्रमण गर्ने विकल्पबारे तयारी गरिरहेको हुन सक्छ। तर, यस्तो आक्रमण गर्न आवश्यक जनशक्ति र परिचालन क्षमता इरानसँग छ वा छैन भन्ने विषयमा अधिकारीहरूबीच मतभेद छ।
ह्वाइट हाउसकी प्रवक्ता लरेन बिसले अमेरिकाले सम्भावित सबै खतरामाथि निगरानी गरिरहेको तर हालसम्म अमेरिकी भूमिमा आक्रमणको कुनै विश्वसनीय खतरा नरहेको बताएकी छन्।
‘डर्टी बम’ सामान्य विस्फोटक पदार्थसँग रेडियोधर्मी सामग्री मिसाएर बनाइने हतियार हो। यो आणविक बमजस्तो शक्तिशाली विस्फोट गराउने हतियार नभए पनि विस्फोटपछि रेडियोधर्मी पदार्थ फैलाएर ठूलो क्षेत्र प्रदूषित बनाउन सक्छ। यसबाट मानिसमा स्वास्थ्य जोखिम उत्पन्न हुनुका साथै प्रभावित क्षेत्र लामो समयसम्म प्रयोग गर्न नसकिने अवस्था आउन सक्छ।
अमेरिकी गुप्तचर सूचनामा इरानले अमेरिकाभित्रै बम निर्माणका लागि आवश्यक सामग्री लुकाएर राखेको दाबीसमेत उल्लेख छ। तर, उक्त सूचनाको विश्वसनीयताबारे अमेरिकी अधिकारीहरूबीच एकमत छैन।
यसैबीच, अमेरिकी अधिकारीहरूले मध्यपूर्वमा तैनाथ आफ्ना सैनिकमाथि इरानले रासायनिक हतियार प्रयोग गर्न सक्ने सम्भावनाबारे पनि निगरानी बढाएका छन्। यसले सैनिक तथा कूटनीतिक कर्मचारीको सुरक्षा तयारीलाई थप चुनौतीपूर्ण बनाएको छ।
इरानको संयुक्त राष्ट्रसंघीय नियोगले भने रासायनिक हतियार प्रयोग गर्ने कुनै पनि आरोप अस्वीकार गर्दै त्यस्ता हतियारको प्रयोगलाई पूर्णतः अवैध र अस्वीकार्य मानेको जनाएको छ।
अमेरिका र इरानबीच होर्मुज जलडमरूमध्यको तनाव, अमेरिकी नाकाबन्दी र युद्ध अन्त्य गर्ने कूटनीतिक वार्ता जारी रहे पनि सहमति जुट्न सकेको छैन। अमेरिकी अधिकारीहरूले इरानले यस्तो आक्रमण गरे त्यसको गम्भीर परिणाम भोग्नुपर्ने चेतावनी दिएका छन्।
प्रतिक्रियाहरू (०)
कुनै प्रतिक्रिया छैन। पहिलो प्रतिक्रिया पोस्ट गर्नुहोस्!
आफ्नो प्रतिक्रिया छोड्नुहोस्