महेश्वर महर्जन
काठमाडौं, बैशाख १ — नयाँ वर्ष २०८३ को अवसर पारेर बुढानिलकण्ठ नगरपालिकाले ऐतिहासिक तथा धार्मिक महत्व बोकेको बागद्वार मेलाको प्रवर्द्धन गर्ने उद्देश्यसहित विशेष “बागद्वार मेला घुमघाम कार्यक्रम” आयोजना गरेको छ।
नगरपालिकाले आयोजना गरेको उक्त कार्यक्रममा करिब १७ वटा बसको व्यवस्था गरी १००० भन्दा बढी सर्वसाधारणलाई सहभागी गराइएको थियो। कार्यक्रम अन्तर्गत सहभागीहरूलाई बुढानिलकण्ठ नगरपालिका कार्यालय परिसरबाट ग्यादी गुम्बासम्म बसमार्फत पुर्याइएको थियो। त्यसपछि उनीहरूले करिब तीन घण्टाको पदयात्रा (हाइकिङ) गर्दै बागद्वार क्षेत्रको अवलोकन गरेका थिए।
कार्यक्रमको मुख्य उद्देश्य बागद्वार क्षेत्रको ऐतिहासिक, धार्मिक तथा पर्यटकीय महत्वबारे जनचेतना अभिवृद्धि गर्नुका साथै आन्तरिक पर्यटन प्रवर्द्धन गर्नु रहेको नगरपालिकाले जनाएको छ। बागद्वारलाई काठमाडौं उपत्यकाको महत्वपूर्ण जलस्रोतको उद्गम स्थलका रूपमा पनि चिनिन्छ, जसले यस क्षेत्रको थप महत्व उजागर गर्दछ।
कार्यक्रमका क्रममा ग्यादी गुम्बामा सहभागीहरूका लागि जलपानको व्यवस्था गरिएको थियो भने पदयात्रा सम्पन्न गरी फर्किएपछि पुनः सोही स्थानमा भोजनको व्यवस्था गरिएको थियो। सहभागीहरूले प्राकृतिक सौन्दर्य, धार्मिक स्थल र ऐतिहासिक सम्पदाको अवलोकन गर्दै नयाँ वर्षलाई विशेष र स्मरणीय बनाएको प्रतिक्रिया दिएका छन्।
नगरपालिकाका प्रतिनिधिहरूका अनुसार यस प्रकारका कार्यक्रमले स्थानीय पर्यटनलाई टेवा पुग्नुका साथै नागरिकहरूलाई आफ्नै क्षेत्रका ऐतिहासिक तथा सांस्कृतिक सम्पदाबारे जानकारी दिन महत्वपूर्ण भूमिका खेल्ने अपेक्षा गरिएको छ। आगामी दिनमा पनि यस्ता कार्यक्रमलाई निरन्तरता दिने योजना रहेको जनाइएको छ।
