महेश्वर महर्जन
काठमाडौँ — प्रधानमन्त्री बालेन्द्र (बालेन) शाहले अतिक्रमित सुकुम्बासी बस्ती हटाउन निर्देशन दिएपछि थापाथली क्षेत्रका सुकुम्बासीहरू बस्ती खाली गर्न थालेका छन्। प्रधानमन्त्री शाहले आगामी शनिबार र आइतबारसम्म सबै अतिक्रमित बस्तीहरू खाली गराउन सुरक्षा निकायका प्रमुखहरूलाई निर्देशन दिएका थिए। गृह मन्त्रालयको जिम्मेवारीसमेत सम्हालिरहेका उनले सुरक्षा अधिकारीहरूसँगको छलफलमा कडा कदम चाल्न आग्रह गरेका हुन्।
यसैबीच, काठमाडौँ महानगरपालिकाले बिहीबार साँझ थापाथलीसहित मनोहरा र सिनामंगल क्षेत्रमा माइकिङ गर्दै तत्काल बस्ती खाली गर्न अल्टिमेटम दिएको थियो। महानगर प्रहरीका अनुसार शुक्रबार बिहानसम्म पनि बस्ती खाली गर्ने क्रम जारी रहेको छ। विशेषगरी थापाथली क्षेत्रमा बसोबास गर्दै आएका परिवारहरूले आफ्ना सामान सार्न थालेका छन्।
महानगर प्रहरीको माइकिङमा शनिबार बिहानै डोजर प्रयोग गरी संरचना हटाइने स्पष्ट सूचना दिइएको थियो। यदि स्वयं बस्ती खाली नगरेमा बल प्रयोग गरेर हटाइने र त्यसबाट हुने क्षति व्यक्तिहरू स्वयंले व्यहोर्नुपर्ने चेतावनी पनि दिइएको छ।
उता, केही युवापुस्ताका अभियन्ताहरू (जेन–जी समूह) भने यस निर्णयको विरोधमा उत्रिने तयारीमा देखिएका छन्। उनीहरूले सुकुम्बासीहरूको उचित व्यवस्थापन बिना जबर्जस्ती हटाउनु अन्याय हुने भन्दै प्रतिवाद गर्ने चेतावनी दिएका छन्।
यस्तै, केही नागरिक समाजका प्रतिनिधिहरूले पनि सरकारको कदमप्रति चिन्ता व्यक्त गर्दै दीर्घकालीन समाधान आवश्यक रहेको बताएका छन्। उनीहरूले वैकल्पिक आवासको व्यवस्था नगरी बस्ती हटाउनु मानवीय दृष्टिकोणले उचित नहुने धारणा राखेका छन्।
सरकार भने सार्वजनिक जग्गा संरक्षणका लागि अतिक्रमण हटाउने अभियानलाई तीव्र बनाउने तयारीमा रहेको छ। अब आगामी दिनमा यस विषयले थप राजनीतिक तथा सामाजिक बहस निम्त्याउने देखिएको छ।
