लुम्बिनीमा भूटानको राजकीय गुम्बा शिलान्यास, नेपाल–भूटान सम्बन्धमा नयाँ आयाम

भैरहवा, असार १४ — बुद्ध जन्मस्थल लुम्बिनीमा भूटान सरकारले राजकीय गुम्बा निर्माणको औपचारिक सुरुआत गरेसँगै नेपाल–भूटान सम्बन्धले नयाँ गति लिने संकेत देखिएको छ। आइतबार विशेष धार्मिक विधिअनुसार सम्पन्न शिलान्यास कार्यक्रममा भूटानका उच्च सरकारी प्रतिनिधि, बौद्ध धर्मगुरु तथा नेपाल सरकारका पदाधिकारी सहभागी भएका थिए।

लुम्बिनी विकास कोष र भूटान सरकारबीच गत वर्ष भएको समझदारीअनुसार सुरु गरिएको यो परियोजनाले धार्मिक पर्यटनसँगै सांस्कृतिक र कूटनीतिक सम्बन्धलाई अझ सुदृढ बनाउने अपेक्षा गरिएको छ। पहिलो चरणमा आवश्यक पूर्वाधार निर्माण अघि बढिसकेको छ भने आगामी दुई वर्षभित्र मुख्य गुम्बासहित सम्पूर्ण संरचना निर्माण सम्पन्न गर्ने लक्ष्य राखिएको छ। गुम्बामा भूटानको मौलिक वास्तुकला, परम्परागत कला, प्रार्थना कक्ष तथा सांस्कृतिक प्रदर्शनी स्थल रहनेछन्।

शिलान्यास समारोहसँगै सम्पन्न नेपाल–भूटान उच्चस्तरीय भेटवार्तामा पर्यटन प्रवर्द्धनलाई केन्द्रमा राख्दै दुई महत्वपूर्ण प्रस्ताव अघि सारिएको छ। नेपालले भूटानको पारो अन्तर्राष्ट्रिय विमानस्थल र भैरहवास्थित गौतमबुद्ध अन्तर्राष्ट्रिय विमानस्थलबीच सिधा हवाई उडान सञ्चालन गर्न आग्रह गरेको छ। साथै पारो–लुम्बिनी–बोधगया धार्मिक पर्यटन सर्किट विकास गर्न सके दक्षिण एसियाली बौद्ध पर्यटनमा नयाँ सम्भावना खुल्ने विश्वास व्यक्त गरिएको छ।

नेपालले अर्को महत्त्वपूर्ण प्रस्तावका रूपमा भूटानले विदेशी पर्यटकबाट लिने दिगो विकास शुल्क नेपाली नागरिकका लागि हटाउन वा सहुलियत दिन आग्रह गरेको छ। यसले नेपाली पर्यटकको भूटान भ्रमण सहज बन्ने र दुई देशबीचको जनस्तरको सम्बन्ध अझ प्रगाढ हुने अपेक्षा गरिएको छ।

भूटानका गृहमन्त्रीले नेपालका प्रस्तावलाई सकारात्मक रूपमा लिँदै सरकारी तहमा थप छलफल अघि बढाउने प्रतिबद्धता जनाएका छन्। साथै गुम्बा निर्माणका लागि नेपालले उपलब्ध गराएको सहयोगप्रति कृतज्ञता व्यक्त गर्दै धार्मिक, सांस्कृतिक र पर्यटन सहकार्यलाई अझ विस्तार गर्ने इच्छा व्यक्त गरेका छन्।

लुम्बिनीमा सुरु भएको यो परियोजना केवल गुम्बा निर्माणमा सीमित नभई नेपाल र भूटानबीच विश्वास, सांस्कृतिक निकटता र बौद्ध पर्यटनको साझा भविष्य निर्माण गर्ने महत्त्वपूर्ण आधार बन्ने अपेक्षा गरिएको छ।