महेश्वर महर्जन
काठमाडौं । अमेरिकी गायिका तथा गीतकार जेसिका लिन नेपाल आउने भएकी छन्। अमेरिकी दूतावास, नेपालको Arts and Music Envoy Program अन्तर्गत नेपाली कलाकारसँग सांगीतिक सहकार्य तथा प्रत्यक्ष प्रस्तुति गर्न उनी नेपाल आउन लागेकी हुन्।
लिनको नेपाल भ्रमणका क्रममा विभिन्न सांगीतिक कार्यक्रम, कार्यशाला तथा सांस्कृतिक आदानप्रदानका गतिविधि हुनेछन्। उनको नेपाल भ्रमणको उद्देश्य अमेरिकी र नेपाली संगीतकर्मीबीच सहकार्य बढाउनु तथा दुवै देशका संगीत संस्कृतिबीच अनुभव आदानप्रदान गर्नु रहेको छ।
लिनले २५ अगस्टमा काठमाडौं ज्याज कन्जर्भेटरी (KJC) मा ‘Sound & Story: Songwriting & Music Composition’ कार्यक्रममा सहभागिता जनाउने कार्यक्रम छ। उक्त कार्यक्रममा गीत लेखन तथा संगीत सिर्जनाको प्रक्रिया, अनुभव र सिर्जनात्मक अभ्यासबारे नेपाली संगीतकर्मीसँग अन्तरक्रिया गर्ने तयारी छ।
त्यसपछि २६ अगस्ट साँझ ५ बजे काठमाडौंको Kathmandu Marriott मा अमेरिकी दूतावासले आयोजना गर्ने Welcome Reception मा उनको सहभागिता रहनेछ। लिनको आधिकारिक कार्यक्रम सूचीमा उक्त कार्यक्रम उल्लेख छ र थप विवरण तथा निमन्त्रणाका लागि अमेरिकी दूतावाससँग सम्पर्क गर्न भनिएको छ।
नेपाल भ्रमणको मुख्य सार्वजनिक सांगीतिक कार्यक्रम भने २९ अगस्ट शनिबार दिउँसो ४ बजे ललितपुरमा हुने भएको छ। लिनको आधिकारिक वेबसाइटअनुसार उक्त कार्यक्रम The Plaza, Pulchowk–Dhobighat Road, Lalitpur मा आयोजना हुनेछ। कार्यक्रमका थप विवरणका लागि अमेरिकी दूतावाससँग सम्पर्क गर्न भनिएको छ।
लिनको नेपाल आगमनले अमेरिकी तथा नेपाली कलाकारबीच सांगीतिक सहकार्यका लागि नयाँ अवसर सिर्जना गर्ने अपेक्षा गरिएको छ। विशेषगरी अमेरिकी कन्ट्री तथा रक संगीतको अनुभवलाई नेपाली संगीत परम्परा र स्थानीय कलाकारको सिर्जनासँग जोड्ने अवसरका रूपमा यस भ्रमणलाई हेरिएको छ।
यसअघि पनि अमेरिकी दूतावासको Arts Envoy कार्यक्रममार्फत नेपालमा विभिन्न अमेरिकी कलाकार तथा संगीतकर्मीले नेपाली कलाकारसँग सहकार्य गर्दै आएका छन्। यस्ता कार्यक्रमले संगीतलाई सांस्कृतिक कूटनीति तथा दुई देशका नागरिकबीच आपसी समझदारी बढाउने माध्यमका रूपमा प्रयोग गर्दै आएको छ।
समय र स्थान:
२५ अगस्ट — Kathmandu Jazz Conservatory, काठमाडौं
२६ अगस्ट, साँझ ५ बजे — Kathmandu Marriott, काठमाडौं
२९ अगस्ट, दिउँसो ४ बजे — The Plaza, Pulchowk–Dhobighat Road, ललितपुर
प्रतिक्रियाहरू (०)
कुनै प्रतिक्रिया छैन। पहिलो प्रतिक्रिया पोस्ट गर्नुहोस्!
आफ्नो प्रतिक्रिया छोड्नुहोस्