चिनियाँ कारको दबाबमा फक्सवागन, १ लाख रोजगारी कटौतीको तयारी

काठमाडौं । चिनियाँ कार निर्माता कम्पनीहरूसँगको बढ्दो प्रतिस्पर्धा, बिक्रीमा आएको गिरावट र नाफामा परेको दबाबपछि जर्मन अटोमोबाइल कम्पनी फक्सवागनले ठूलो पुनर्संरचना गर्ने भएको छ।

कम्पनीले सन् २०३० सम्म थप ५० हजार रोजगारी कटौती गर्ने योजना स्वीकृत गरेको छ। यससँगै दशकको अन्त्यसम्म विश्वभर फक्सवागनले करिब १ लाख रोजगारी घटाउने भएको छ।

विशेषगरी विद्युतीय सवारीसाधनको बजारमा चिनियाँ कम्पनीहरूको तीव्र विस्तारले फक्सवागनमाथि प्रतिस्पर्धात्मक दबाब बढाएको छ। बिक्रीमा कमी आउनु र नाफा घट्नुका कारण कम्पनीले खर्च नियन्त्रण तथा उत्पादन प्रणालीलाई थप प्रभावकारी बनाउने रणनीति अघि सारेको हो।

फक्सवागनले सन् २०३५ सम्म उत्पादन गर्ने कारका मोडलको संख्या ५० प्रतिशतले घटाउने योजना बनाएको छ। त्यस्तै, उत्पादन प्रक्रियामा रहेको जटिलता पनि करिब ७५ प्रतिशतले कम गर्ने लक्ष्य राखिएको छ।

कम्पनीले बजारको मागअनुसार उत्पादन क्षमता मिलाउने क्रममा केही कारखानाको भविष्यबारे समेत समीक्षा गरिरहेको जनाएको छ। मागभन्दा उत्पादन क्षमता बढी रहेका कारखानामा आवश्यक परिवर्तन गरिने संकेत कम्पनीले दिएको छ।

सन् २०२५ सम्म फक्सवागन समूहमा विश्वभर ६ लाख ६० हजारभन्दा बढी कर्मचारी कार्यरत थिए। त्यसको ठूलो संख्यामा रोजगारी कटौती गर्ने योजनाले कम्पनीको संगठनात्मक संरचना र उत्पादन प्रणालीमा व्यापक परिवर्तन ल्याउने अपेक्षा गरिएको छ।

अटोमोबाइल उद्योगमा विद्युतीय सवारीसाधनको विस्तार, बदलिँदो उपभोक्ता माग र चिनियाँ उत्पादकहरूको प्रतिस्पर्धाले परम्परागत युरोपेली कार कम्पनीहरूलाई नयाँ रणनीति अपनाउन बाध्य बनाइरहेको छ।

फक्सवागनको पछिल्लो निर्णय पनि यही बदलिँदो विश्व अटोमोबाइल बजारअनुसार कम्पनीलाई पुनःसंरचना गर्ने प्रयासका रूपमा हेरिएको छ।