भाइरल ‘ब्याड टच’ प्रकरणमा फरार शालीन साह हुलिया बदलेर भाग्दै गर्दा कलंकीबाट पक्राउ

काठमाडौं । ठमेलमा एक युवतीमाथि दुर्व्यवहार गरेको आरोपमा सामाजिक सञ्जालमा भिडियो सार्वजनिक भएपछि फरार रहेका शालीन साहलाई प्रहरीले पक्राउ गरेको छ। लामो कपाल तथा दाह्री-जुँगा काटेर हुलिया परिवर्तन गरी अनुसन्धानबाट उम्किने प्रयास गरिरहेका साहलाई शनिबार कलंकी क्षेत्रबाट नियन्त्रणमा लिइएको प्रहरीले जनाएको छ।

काठमाडौं उपत्यका अपराध अनुसन्धान कार्यालय, टेकु र प्रहरी वृत्त सोह्रखुट्टेको संयुक्त टोलीले साहलाई कलंकीस्थित तासिनडोल क्षेत्रबाट पक्राउ गरेको हो। प्रहरीका अनुसार भदौ १८ गते ठमेलमा भएको भनिएको घटनाको भिडियो सामाजिक सञ्जालमा भाइरल बनेपछि साह प्रहरीको खोजी सूचीमा परेका थिए।

भिडियो सार्वजनिक भएपछि घटनाबारे अनुसन्धान अघि बढाउँदै प्रहरीले साहको खोजी तीव्र पारेको थियो। प्रहरीको अनुसन्धानका क्रममा उनले आफ्नो बाहिरी स्वरूप परिवर्तन गरेको खुलेको बताइएको छ। लामो कपाल तथा दाह्री-जुँगा काटेर नयाँ हुलियामा देखिन थालेपछि उनी पहिचान लुकाउँदै भाग्ने प्रयासमा रहेको प्रहरीको भनाइ छ।

पक्राउ परेका साह ३० वर्षका रहेको र तराई मूलका भएको प्रहरीले जनाएको छ। घटनामा पीडित युवती पनि नेपाली नागरिक नै रहेको बताइएको छ।

प्रहरीले पक्राउपछि प्रारम्भिक प्रक्रिया पूरा गरी थप अनुसन्धानका लागि साहलाई जिल्ला प्रहरी परिसर, भद्रकाली पठाएको थियो। त्यसपछि घटनाको कार्यक्षेत्र पर्ने प्रहरी वृत्त लैनचौर (सोह्रखुट्टे) मा उनलाई जिम्मा लगाइएको जनाइएको छ।

प्रहरीले घटनासँग सम्बन्धित भिडियो, प्रत्यक्षदर्शी तथा अन्य उपलब्ध प्रमाणका आधारमा अनुसन्धान अघि बढाउने जनाएको छ। सामाजिक सञ्जालमा भिडियो भाइरल भएपछि सार्वजनिक चासो बढेको यस घटनामा अनुसन्धानपछि प्राप्त तथ्यका आधारमा कानुनी प्रक्रिया अघि बढाइने प्रहरीको भनाइ छ।