नोरा फतेहीविरुद्ध ३ करोडको मानहानि मुद्दा, ‘खेलौना विमान’ भनेपछि कानुनी झमेलामा

बलिउड अभिनेत्री तथा डान्सर नोरा फतेही एउटा चार्टर्ड विमानसम्बन्धी सामाजिक सञ्जाल टिप्पणीका कारण कानुनी विवादमा परेकी छन्। भारतीय एभिएसन कम्पनी ड्यून्स एभिएसनले उनीविरुद्ध ३ करोड भारतीय रुपैयाँ क्षतिपूर्तिको माग गर्दै गान्धीनगर अदालतमा सिभिल मानहानि मुद्दा दायर गरेको हो।

मुद्दा अनुसार, डिसेम्बर २०२५ मा मुम्बईबाट जयपुर जाने क्रममा नोरा ड्यून्स एभिएसनको Cessna Citation CJ2 विमानमा यात्रा गरेकी थिइन्। यात्राका क्रममा उनले विमानभित्र भिडियो बनाएकी थिइन्। उक्त भिडियो इन्स्टाग्राममा पोस्ट गर्दै उनले विमानलाई ‘मिनिएचर’, ‘टॉय’ तथा ‘लेगो एयरप्लेन’ जस्ता शब्द प्रयोग गरेको कम्पनीको आरोप छ।

कम्पनीले नोराको टिप्पणीलाई गैरजिम्मेवार र प्राविधिक ज्ञान तथा तथ्यको प्रमाणीकरणबिनाको अभिव्यक्ति भएको दाबी गरेको छ। नोराका सामाजिक सञ्जालमा ४ करोड ६० लाखभन्दा बढी फलोअर्स भएकाले उनको टिप्पणीले कम्पनीको प्रतिष्ठा र व्यवसायमा प्रतिकूल प्रभाव पारेको ड्यून्स एभिएसनको दाबी छ।

कम्पनीका अनुसार उक्त घटनापछि बुकिङमा १५ देखि २० प्रतिशतसम्म गिरावट आएको र केही ग्राहकले बुकिङ रद्द गरेका थिए। तर, यो तथ्य अदालतबाट प्रमाणित भइसकेको नभई कम्पनीले अदालतमा गरेको दाबी हो।

ड्यून्स एभिएसनले विमान पूर्ण रूपमा उडानयोग्य, भारतको नागरिक उड्डयन महानिर्देशनालय (DGCA) बाट प्रमाणित तथा वैध Non-Scheduled Operator’s Permit अन्तर्गत सञ्चालन भइरहेको दाबी गरेको छ।

कम्पनीले ३ करोड रुपैयाँ क्षतिपूर्तिसँगै विवादित सामाजिक सञ्जाल सामग्री हटाउन र नोराबाट सार्वजनिक स्पष्टीकरण गराउन पनि अदालतसँग माग गरेको छ।

मुद्दा अप्रिल २०२६ मा दायर गरिएको बताइएको छ। गान्धीनगरका वरिष्ठ सिभिल न्यायाधीश आर. अग्रवालको इजलासमा यसको अर्को सुनुवाइ २५ सेप्टेम्बर २०२६ मा हुने तय भएको भारतीय सञ्चारमाध्यमहरूले जनाएका छन्।