राजविराज अस्पतालबाहिर प्रसव पीडामा छटपटाइन् महिला, सामाजिक सञ्जालमा भिडियो सार्वजनिक

राजविराज । सप्तरीको राजविराजस्थित गजेन्द्रनारायण सिंह अस्पताल बाहिर एक गर्भवती महिला प्रसव पीडामा छटपटाइरहेको दृश्य सामाजिक सञ्जालमा सार्वजनिक भएपछि अस्पतालको सेवा र व्यवस्थापनमाथि प्रश्न उठेको छ।

सामाजिक सञ्जालमा उपलब्ध सीसीटीभी दृश्यअनुसार बुधबार, ९ सेप्टेम्बर २०२६ बिहान करिब ४ः३० बजे एक महिला अस्पतालनजिकैको सडकपेटीमा प्रसव पीडाले छटपटाइरहेको देखिन्छिन्। उनीसँगै केही व्यक्तिहरू रहेको र एक महिलाले उनलाई सम्हालिरहेको दृश्यमा देखिन्छ।

सामाजिक सञ्जालमा सार्वजनिक विवरणअनुसार, ती महिला प्रसव व्यथाले च्यापिएपछि अस्पताल पुगेकी थिइन्। तर, आर्थिक अवस्था कमजोर भएका कारण उपचारमा समस्या भएको र अन्ततः अस्पतालबाहिरै प्रसव गर्नुपर्ने अवस्था आएको दाबी गरिएको छ।

सार्वजनिक गरिएको सीसीटीभी दृश्यमा महिला सडकपेटीमै अत्यन्त पीडामा रहेको देखिए पनि अस्पतालले नै पैसा मागेर उनलाई बाहिर निकालेको हो वा अन्य कारणले उनी अस्पतालबाहिर पुगेकी हुन् भन्ने विषय भने स्वतन्त्र रूपमा पुष्टि भइसकेको छैन। त्यसैले सामाजिक सञ्जालमा गरिएको दाबीलाई हाललाई दाबीका रूपमा मात्र लिनुपर्ने देखिन्छ।

गजेन्द्रनारायण सिंह अस्पताल सप्तरीका सर्वसाधारण, विशेषगरी विपन्न तथा ग्रामीण क्षेत्रका नागरिकका लागि महत्वपूर्ण सरकारी स्वास्थ्य संस्था हो। यस्तो अस्पतालको मूल उद्देश्य नै आर्थिक अभावका कारण उपचारबाट वञ्चित हुन सक्ने नागरिकलाई स्वास्थ्य सेवा उपलब्ध गराउनु हो। तर, अस्पतालमा चिकित्सक तथा स्वास्थ्यकर्मीको अभाव, सेवा व्यवस्थापन र प्रसूति सेवासम्बन्धी समस्या विगतमा पनि उठ्दै आएका छन्।

यस घटनाले सरकारी अस्पतालमा प्रसवजस्तो संवेदनशील अवस्थामा पुगेका महिलालाई तत्काल उपचार र आवश्यक मानवीय सहायता उपलब्ध गराउने व्यवस्था कति प्रभावकारी छ भन्ने प्रश्न उठाएको छ।

सामाजिक सञ्जालमा सार्वजनिक भएको दृश्य र विवरणपछि स्थानीयस्तरमा घटनाको सत्यतथ्य छानबिन गर्नुपर्ने आवाजसमेत उठेको छ। अस्पताल प्रशासनले ती महिला अस्पतालमा उपचारका लागि पुगेकी थिइन् कि थिइनन्, उनलाई के–कस्तो उपचार दिइयो, उनी अस्पतालबाहिर कसरी पुगिन् र वास्तवमै सडकपेटीमै प्रसव भएको हो वा होइन भन्नेबारे स्पष्ट जानकारी दिनुपर्ने देखिन्छ।

सामाजिक सञ्जालमा उपलब्ध विवरणका आधारमा घटना सार्वजनिक भएको हो। सम्बन्धित अस्पताल वा स्थानीय प्रशासनबाट आधिकारिक धारणा आएपछि घटनाको वास्तविकता थप स्पष्ट हुनेछ।

सिसिटिभी फुटेज यता छ ।